„დავით ნარმანია არის ადამიანი, რომელსაც ვიცნობ თითქმის 20 წელია. ის გამორჩეულია ცოდნით, პატიოსნებითა და უანგარობით, როდესაც საქმე ეხება შრომას", - პარლამენტის თავმჯდომარე დავით უსუფაშვილი თბილისის მერის, დავით ნარმანიას საქმიანობას აფასებს.
უსუფაშვილის თქმით, თბილისს აქვს ბევრი თემა და საკითხი, რომლის მოგვარებასაც სჭირდება ბევრი ადამიანის ერთობლივი შრომა, ამ შრომას კი - გარკვეული გამოკვეთა, წარმოჩენა.
„შესაძლოა დავითების პრობლემაა. მეც მეუბნებიან, რომ ნაკლებს წარმოვაჩენ, ვიდრე ვაკეთებ და დათოსაც [ნარმანიას] მინდა ვთხოვო, მეტად წარმოაჩინოს ის, რასაც აკეთებს, თავადაც და მერიაც. ყოველი ჯერ კიდევ ამოუვსებელი ორმო ქალაქში ნუ იქნება შეფასების კრიტერიუმი, ან ჯერ კიდევ დაურგავი ხე", - ამბობს დავით უსუფაშვილი.
როგორც პარლამენტის თავმჯდომარე ამბობს, ხეები მართლა ირგვება და ეს კარგია. „ნახევარი მილიონია თუ რამდენი, ეს არ ვიცი, გარემოს დაცვა რომ არის მერიის პრიორიტეტი, ეს კარგია მომწონს და ვურჩევ, რომ ასე გააგრძელოს", - თქვა უსუფაშვილმა.
